1Cor 2 | GbrGAW | STEP | Ema zado, esanu mi ɓei ɓe fya aba ma gna fye Shekwoyi nabari ceyi, mi to ɓei zhan pma na ɓeda dadai yi, ko ɓeyekpe dnagmaiyim.

1 Corinthians 2

Shekwoyi Shiri Mama Nya

1 Ema zado, esanu mi ɓei ɓe fya aba ma gna fye Shekwoyi nabari ceyi, mi to ɓei zhan pma na ɓeda dadai yi, ko ɓeyekpe dnagmaiyim. 2 Gama mi ɓei la tu ge miɓa bwa ɓeda tu n Yesu tukwo nu n Wo fiyi tu n zundu. 3 Ntucenu ma ɓe fya ba dna n kalagba, n dnawo yi, n vinvin yi. 4 Mi to ɓei zhin waʼazi n ɓeda dadai yi zanyikoci ɓeyekpe nyam, ama Zafun Gyi-gyi-yi ɓei dna n ma ɓeda Woi wu aza nɓa ɓa wo nyi ge, tnutnu ɓo gmi n Shekwoyi aba nu. 5 Nɓei zhin lonu n nabai efye gaiciyaga kwa kpema Shekwoyi nu, toge zanyikoci ho ɓeyekpem.

6 Ama mi daɓo ɓeyekpe nya n nazayi n ɓaku mwa dna zafun. Ɓeyekpe ye ta gmi nanyi ye num, kwoi ta daɓo ga aza-yako anyi ye nya nu nɓa zhi ɓai miya nyim. 7 Eyi aɓeda zhin ɓeyekpe nya nu, ntuge ɓa kun n Shekwoyi aba nu, ɓai wu Shekwoyi shiri ɓeyekpe nya kwa lo yi na gmada eshe nya. Shiri ye ɓei bwi shi n sapa, ko da shike aɓo zhin ko ntu ya pma bwa ɓo nu kafin ma a zhin anyi. 8 Ama aza-yako anyi nya to ɓei kpe ce yem, ntuge ɓa ɓei gna ɓa kpe koye nu, ɓa to ɓei ɓa zun Dagayi mwa-mwa nya du m.

9 Nya nu n Littafi Gyi-gyi-yi kwa da cei ge zaho-zahoi to shin gye, ko wa wo, ko wa zhin ɓo nubo cei, enya Shekwoyi ku zhin shiri ntu naza ɓo nɓa yewo nyi m. 10 Ama yi kpe aɓeye yelo ntuge Shekwoyi la tnu n Wo Zafun yi Wa gna yi, owo Zafun zhin wa bi aba ya vinya, Wa wuyi asiri shin-shin-yi Shekwoyi nya. 11 She zanyikoci zafun n ko dna womi nyi, oko gmanyi nu kpe wa ɓenubozhin ye, n lonu zaho-zahoi ta kpe Shekwoyi aɓo nubozhin yem, sai Owo Zafun gmanyi. 12 Yi to gwo zafun anyi ye nya num, ya gwo Zafun n Shekwoyi nu, Wa wu yi anyaga amanai alheri nya n Shekwoyi ku ga yi nyi. 13 Ntu cenu aɓeda nʼya da vinya, Zafun Gyi-gyi-yi nu na gayi ɓa, aɓeda nu to n zanyikoca knim. Ntu cenu yi zhin apma n Zafun Gyi-gyi-yi aɓeda yi ɓa wu Zafun Gyi-gyi-yi aɓo n ɓahin yi. 14 Ama oza n wo to n Zafun yim, wo ta mi wa gwo anya n Shekwoyi Zafun gayim, ntuge wo ta kpe ɓa wyegam, ɓa zhin gboloyi nu n wa ba. Sai oza nwo Zafun Gyi-gyi-yi, wonu ɓa kpe Zafun Gyi-gyi-yi aɓo ye. 15 Oza wo n zafun yi wo zhin wa mwi aɓo vinya, wa ku ɓa kpeye. Oɓo nu kuwa nko dami nanyi da yi, ntuge wota kpe zafun-da ʼɓoyem – ko fyefye. 16 Wo ɓa mi wuna? Ntuge wo to zhin oza nu nwo shin Dagayi aɓonubozhin ye kpem ko wa daɓo Woyi, ko wa shin Shekwoyi bwa ashanje nwa duwa zhin mim. Ama eyi a Yesu viyi, yi n Kristi bugba yi shi lo n Wa ɓe nubo zhin yi.